Det kostar å drifte tog

Av Kjell Arve Nygård

Fridom er ikkje noko sjølvfølgje

det er eit privilegium

opparbeidd av generasjonar

som har gjort meir

enn å gå i tog og rope hurra

det er folk som har ofra livet

og stått på barrikadane

og gått i bresjen i trua på demokratiet

som har gjort til at du kan gå i toget

og rope hurra

eit tog som må byggjast

og haldast ved like dagleg

for at det ikkje skal slutte å gå

Taus

Er du ein av dei

som meiner i det stille

husk å gå stille i dørene

så du ikkje vekkjer nokon

som kan ta det ille opp

det kan koste deg stilla

så berre fortsett som før

for å meine i det stille

det kostar ingenting

men kanskje

kjem det ein gong

at du tenkjer

den prisen

burde eg sjølv

ha betalt

På grusveg

Eit par barnesko på veg bort

frå restar av tryggleik

lagt i grus

av krig og brutalitet

igjen ligg leivningar

av det som ein gong var

mor og familie

og på kanten

går framtida

i sko nummer tjueto

Kostbar

Takksemd

er ein undervurdert

eigenskap

som fleire

burde verdsetje

© Kjell Arve Nygård

@GalleriKAN